Öisi Läischtige chömed gèrn zu ine hei
Bi de Baasisvariante Houmdiliväry lifered mir d Sändig bis zum Randschtei vom Privaat- oder Gschäftschund – ooni zuesäzzlichi Dienschtläischtige. Diä Uufgaab übernimmt e kwalifiziärti Persoon.
– Keine Zuesazzopzioone
Bi Houmdiliväry+ lifered mir d Bschtelig an Verwändigsort. Das isch mäischtens d Wonig oder de Gaarte, chan aber au es Büro oder en Schopp sii. Für das schikked mir zwäi kwalifiziärti Persoone los. S Pluss schtaat für praktischi Opzioone, wo Si individuell chönd dezuebueche.
+Zuesazzopzioone
Wääled Si us dene Zuesazzopzioone
Uspacke und Mitnaahm vo Verpackigsmateriaal
Fachgrächti Entsorgig vo alte Mööbel
Fachgrächti Entsorgig vo Altgrèèt
Montiäre oder Inschtalliäre vo Mööbel und Grèèt
Wääled Si us dene Zuesazzopzioone:
Uuspacke und Mitnää vo Verpackigsmateriaal
Fachgrächts Entsoorge vo alte Mööbel
Fachgrächts Entsoorge vo Altgrèèt
Montiäre oder Inschtalliäre vo Mööbel und Grèèt
Öises Pluss isch Iri Opzioon
S Pluss bi Houmdiliväry+ schtaat für praktischi Opzioone wo Si je nach Wunsch und Bedarf chönd dezuebueche.
Uuspacke und Mitnää vo Verpackigsmateriaal
Öb dihäi, im Büro oder im Gschäft – mir packed di gliferete Waare uus, nämed alles Verpackigsmateriaal mit und füereds enere professionelle Entsoorgig oder Widerverwèrtig zue.
Fachgrächts Entsoorge vo alte Mööbel
Wänn alti Mööbel Irne Nöiaaschaffige müend wiiche, nämed mir ales Altdiänte mit und entsoorgeds sachgemääss.
Fachgrächts Entsoorge vo Altgrèèt
Grill, Wöschmaschine oder Fernsee – was au immer für Grèèt ersezzt werdät, mir nämeds mit und entsoorgeds soo, wi sichs ghöört.
Montiäre und Inschtalliäre vo Mööbel und Grèèt
Vilicht möchted Iri Chunde di bschtellte Mööbel und Grèèt nöd sälber uufboue. I dem Fall legged öisi gschuelte Mitarbäitende gèrn Hand aa für Sii.
Perfäkt für Ii-Komerss- und Multitschänneling: Planzer-Houmsèrviss-Gsamtlöösige
Ire Houm-Swiit-Houmsèrviss
Mit de webbasiärte Technologii vo Houmdiliväry und Houmdiliväry+ sind Iri Chunde grad meerfach im Vortäil:
- Dünaamischi Onläintermiinwaal
- Elektroonischi Voraakündigung
- Läiv-Träcking
- Diräktkomunikation
Das und vili wiiteri Extras garantiäred en äimaaligs Lifererläbnis.
Blikk fürs Ganze, Fläär fürs Detäil
Als Gschäftschund verlanged Si Beschtläischtige und Löösige mit ere ganzhäitliche Perspektiive. Drum veräined mir i de Gsamtlöösige öises Beschte us Transport, Laagerlogistik, EiiTii und Technik. Ganz gliich, i welere Brañsche Si täätig sind und weli Useforderige Si aagönd: Mir sind Ire Vertrouenspartner für interessanti Opportunitääte.
Ii-Komerss
Onläin bschtele isch añ Voog. Mir vo Planzer sind Aabüüter vo Gsamtlösigä und bewirtschafted Ire Schopp, übernämed di gsamti Laagerlogistik und lifered schliässlich di bschtellte Sändige bis ad Huustüür vo Irne Chunde. Oder uf jede Kwadraatmeeter, wo diä Bschtelig zum Iisazz chunnt. Ganz wichtig: D Fröid bim Überchoo isch no mindischtens gnau so grooss wi bim Bschtele.
Mööbel
Wer nöii oder pruuchti Mööbel bschtellt hät, möcht sich drüber fröie und nöd Schwèèrarbet läischte. Drum bringed mir d Mööbel häi und schteled si fachgrächt uuf. Dass s Glücksgfüül freii Baan hät, nämed mir sämtlichs Verpackigsmateriaal wider mit und entsoorgeds fachgrächt oder füereds wo immer mögli ere Widerverwèrtig zue.
Huus + Gaarte
Huus und Gaarte sind i de letschte Jaar immer wichtiger woorde, siit Coroona erscht rächt. Mir bringed ales häi, wos zum Schpile, Entschpane und Woolfüüle bruucht. Und will mer Iirichtige für Huus und Gaarte mäischtens erscht vor Ort chan uufboue oder montiäre, übernämed mir au diä Handgriff. So chan de Gnuss vo Läbesruum sofort aafange.
Huushalt-/Professionaal-Grèèt
Elektrogrèèt wi Wöschmaschine, Tömbler oder Abwäschmaschine sind chliini technoloogischi Wunder. Umso wichtiger isch es, dasene bim Transport und Händling nüüt passiärt. Drum erlediged mir de sicheri Transport, s Uuslifere, d Montaasch, d Funkzioonskontrole, d Grobräinigung und d Abnaam. Verpackigsmateriaal und Rötuure füered mir sälbverschtändlich zrugg.
Fitness
Fit sii isch im Trènd. Di äinte bliibed für das gèrn dihei, anderi gönd is Fitness-Zenter. Mit öisere Fitnesslogistik sorged mer defüür, dass Iri Fitnessgrèèt sicher am Verwändigsoort aachömed und dass Si nüüt mit Verzolig, Laagerig, Uusliferig und Rötuuremänätschment z tue händ. So bhalted mir d Zfridehäit vo Irne Chunde in Toppform
Häimelektroonik
I Ziite von stei@houm (stay@home) hät d Häimelektroonik Hoochkoniunktuur. Für Iri TVs, Houm-Cinema-Aalaage, Kompiuuterbildschirm, Saundschtazioone und wiitere elektroonische Grèèt übernämed mir di gsamti Voor- und Rückwèrzlogistik. Mir montiäred Grèèt, mached si funkzioonsberäit und laded d Verpackige wider ii. Da debii dörfed Si au uf öisi Kompetänz i de Laagerlogistik zelä.
Ripäärlogistik
Tüüri TV-Scriins, groossi Monitoore und anderi elektroonischi Grèèt laat mer hüt gèrn repariäre. Mit öisere Ripäärlogistik holed mir di defekte Obiäkt bi Irne Chunde ab, bringed si zum Reparatuurdienscht und zrugg an Verwändigsort. Uf Wunsch erlediged mir d Zollformalitääte und s Zwüsche- oder Iilaagere. Mee da dezue erfaared Si i öisere Gschicht.
Gueti Gründ, werum mir öis sötted käneleere
Äs git meh als ein guetä Grund, werum sich e Zämearbet mit Planzer Houmsèrviss für Si lohnt. Zu dä wichtigstä zellt, dass mir di positivä Emozioone Irerä Maargge direkt hei zu Ire Chunde bringed.
Mänsche naachhaltig begäischtere
- Wänn Si Ires Aagebot um Montaasch, Uufbou, Inschtallazioon und Entsoorgig erwiitered, differänziäred Si sich von Irne Mitbewèrber.
- Mir benaachrichtiged Iri Chunde in Ächtziit und mobiil über d Liferig vo de Sändig. Diä Komunikazioon isch im Co-Bränding mögli.
- I öisere Zentraale für Chundenaaligge kümmered mir öis persöönlich und zuvoorkommend um ali Aaligge rund um d Liferig.
- Si variabilisiäred mit öis Iri Fixchöschte und sezzed Rössursse für Ires grööschte Potenziaal frei: Iri Chunde.
- Si büüted Irne Chunde für chliineri Sändige en erschtklassige Päcklisèrviss aa.
Mit em richtige Partner underwäx sii
- Als Familiäundernäme i de dritte Generazioon schtönd mir für d Kwalitäät vo öisne Läischtige mit öisem Name.
- Für Iri Ii-Komerss- und Multitschännel-Aaligge beziänd Si sämtlichi Läischtige us äinere Hand.
- Mir schteled Ine öisi langiäärig Erfaarig mit Gsamtlöösige i de Logistik ad Siite – vo de (internazionaale) Voorholig über d Laagerig, Komissioniärig, Konfekzoniärig bis zum Transport und zu de Fiinvertäilig.
- Mitere äigene Inovazioonsabtäilig bliibed mir am Puls vo de Ziit und übernämed für Sii d Wiiterentwicklig vonere hochmodèrne Logistik.
Vertroue schaffe, wo sich uuszallt
- Öisi kwalifiziärte Mitarbäitende schteled sicher, dass sich Iri Chunde gèrn a Sii und Iri Maargge erinnered.
- Für das sezzed mir e hochentwickleti Web-Äpp für die gsamti Komunikazioon ii.
- Mir bilded öisi Faarerine und Faarer i huusäigene Uusbildigszäntre uus und zaled si guet für iri Aarbet.
- Mir underhalted Standort i de ganze Schwiiz. So bediäned mir Iri Chunde i de richtige Landesspraach und meischtens sogaar im passende Dialäkt.
- D Mäinig vo Irne Chunde zellt: Öisi Reiting-Noote sind erfröilich guet.
Mit ere topmodèrne EiTii flexiibel bliibe
- Vom Support bis zum Softwäär-Inscheniiring beschäftiged mir i öisere EiTii mee als 60 Fachpersoone. Diä geballti Kompetänz schtaat Ine zur Verfüegig.
- Mit Iilektronik Däta Interfeissis (EDI) binded mir Iri ERP-Sischteem naatloos a öises Houmsèrviss- und Lagerlogistiksischteem aa.
- Mir verfolged e Klaud-First-Strategii und betriibed di virtuelle Sörver und s Netzwerch sälbständig. Das häisst, dass mir punkto Apdeits, EiTii- und Sseibersicherhäit toppfitt sind.
E schtarchs Chundeportaal nuzze
I öisem Chundeportaal bewirtschafted Si Iri Transport- und Laagerlogistikdaate rund um d Uur mit jedem beliäbige Grèèt. Da gits en Überblick über di wichtigschte Tuuls und Funkzionalitääte..
Track & Trace
Da demit verfolged Si Iri Houmsèrviss-, Stückguet-, Päckli- und Nachtsändige in Ächtziit. Bim Waareniigang leged mir jedere Versandäinhäit en elektroonischi Fuessfessle aa. Sobald mir Iri Sändig uusgliferet händ, schtaat e Liferbestäätigung als PDF für Sii beräit.
TransNet
Mit deren Äpp erfassed Si Iri Transportuuftrèèg schnäll und sicher, mutiäred wichtigi Eggdaate wiä Empfängerinschtrukzioone, Liferziit oder Art vo de Waar und nämed Uuswèrtige voor. Sämtlichi Daate vo den aktuelle Uufträäg bliibed schtändig erhalte und sind für Sii jederziit iiseebaar.
LogNet
Das Tuul nuzzed Si für Uufträäg i de Laagerlogistik. Da erfassed Si Konfekzioniärigs- und Komissioniärigsuuftrèèg, verwalted Stammdaate oder Sperrstaatus, tschägged Ire Beschtand und gseend Liferschii oder Rächnigsbiilaage ii. Ali Dokumänt ligged i öisne elektroonische Archiiv.
Gèrn persöönlich für Si daa
Heinz Wiedemeier
Mitgliid vo de Gschäftsläitig
Läiter Planzer Houmsèrviss
Planzer Homeservice
Planzer Transport AG
Lerzenstrasse 14
8953 Dietikon
Direktkontakt
