Planzer Houmsèrviss müend Si äifach sälber erläbe

Nöd umesuscht gänd öis Empfängerine und Empfänger beschti Reiting-Noote.

E bsunders Erläbnis

Mööbel, Grèèt und Aalaage im Internet z bschtele isch äifach, macht Fröid und laat Voorfröid uufchoo. Öis isch es wichtig, dass diä positiive Emozioone au dänn no sind, wänn d Liferig bi Irne Chunde iitrifft. Für das müend si sich vo de Bschtelig über d Liferig bis zum fertige Uufbou sicher und persöönlich betröit füüle. Fraage rund um d Liferig beantwoorted öisi Mitarbäitende i de Zentraale für Chundenaaligge.

Klikk, bschtellt – und jetzt?

D Waar wird im Onläinschopp oder vor Ort imene Gschäft zalt. Ab da chunnt dä Planzer Houmsèrviss is Schpiil. Sobald mir Ire Liferuuftraag überchoo händ, plaaned mir di minutegnaui Liferig.

Termiinwaal
Liferaakündigung
Läiv-Träcking
Tschätt
Vor-Ort-Tschägg ✓
Reiting ★★★★★
Daatekonsischtänz (end2end)

Termiinwaal

Nach em Chauf chömed Iri Chunde per SMS und Ii-Meil en Link zu de Termiinwaal über. Für das bruuched si kä zuesätzlichi Äpp. Mir büüted sächs Wunschtermiin mit jeewiils eme Ziitfänschter vo viär Schtund zur Uuswaal. Passt käne vo öisne Vorschlääg, chönds d Uuswaal erwiitere. Usserdem dörfeds iri Kontaktaagaabe prüefe und falls nöötig korrigiäre.

Liferaakündigung

Näbscht dä Wunschtermiinwaal chönd d Kontaktaagabe nomal überprüeft und korrigiärt werde. Zudem staht es wiiter Fäld für Bemerkige wie Liferhiiwiis – Bischpiilswiis «Bitte nöd vor d Garaaschiifaart parkä» – zur Verfüegig.

Läiv-Träcking

Äin bis zwäi Taag vor em veriibaarte Lifertermiin schikked mir e wiiters SMS und Ii-Meil. Da gränzed mir das Viär-Schtunde-Ziitfänschter uf zwäi Schtund ii. Zirka e Schtund vor dem Ziitfänschter gits en Link zum Läiv-Träcking. Ufere Chaarte gseet mer jetzt öises Faarzüüg us de Vogelperschpektiive. Oder mer wächsled id Striitviuu-Aasicht.

Tschätt

IIsch öises Tiim zum Liferort underwäx, chan imene verdekkte Tschätt-Fänschter mit de biifaarende Persoon komuniziärt werdä. In dem Tschätt chönd wiiteri hilfriichi Imformazioone für e riibigsloosi Aaliferig duregäh oder Wünsch aabracht werdä. Zum Bischpiil: «Bitte zunderscht lüüte».

Vor-Ort-Tschägg

Jee nachdèm, weli Lifervariante und Zuesazzopzioone Si für iri Chunde gwäält händ, erbringt öises Houmsèrviss-Tiim wiiteri Dienschtläischtige: Mir packed d Waar vor Ort uus, montiäred oder inschtalliäred si und nämed s Verpackigsmateriaal oder di alte Mööbel und Grèèt wider mit, zum alles fachgrächt entsoorge.

Reiting

Iri Chunde täiled öis mit, wiä si dä Planzer Houmsèrviss erläbt händ. Nur soo chömers bim nächschte Maal gnauso guet oder besser mache. Öises webbasiärte Bewèrtigssischteem isch natüürlich vollschtändig anonümisiärt.

Daatekonsischtänz

Vo de Bschtelig über d Termiinplaanig bis zu de Uusliferig vo dä Sändig bliibed Iri Daate und Zuesazzimformazioone unveränderet und vollumfänglich sicher (end2end). Da demit verlüüred weder Sii no miir unnötig Ziit mit em Überträäge und Aktualisiäre vo Daate.